सरस्वती पूजाकै दिन अस्ताइन ‘स्वर कोकिला’
पढ्न लाग्ने समय : 2 मिनेट
प्रसिद्ध गायिका लता मंगेशकरको ९२ वर्षको उमेरमा निधन भएको छ । ‘स्वर कोकिला’ उपनामले चिनिने लताको आज सरस्वती पूजाकै दिन निधन भएको हो ।
मुम्बईको ब्रीच क्याण्डी अस्पतालमा उपचारको क्रममा आज बिहान लताको निधन भएको प्रेस ट्रष्ट अफ इण्डियाले जनाएको छ । कोरोना संक्रमण भएपछि उनलाई अस्पतालमा भर्ना गरिएको थियो । केही दिनयता उनलाई भेन्टिलेटरमा राखिएको थियो । उनले ३६ भाषामा हजारौं गीत गाएको भारतीय मिडियाहरुले उल्लेख गरेका छन् । उनले थुप्रै नेपाली गीत पनि गाएकी छन् । माइतीघर चलचित्रमा समावेश भएको उनले गाएको राजा महेन्द्रद्धारा रचित गीत 'जुन माटोमा मेरो जन्म लिने सौभाग्य भयो...' निकै चर्चित गीतहरूमा पर्दछ ।
भारतीय प्रधानमन्त्री नरेन्द्र मोदीले लताको निधनले भारतलाई अपूरणीय क्षति पुगेको भन्दै शोक व्यक्त गरेका छन् । लताको निधनको बलिउड र संगीत क्षेत्र शोकमा छ । हजारौंले सामाजिक सञ्जालमा लताको योगदानको स्मरण गर्दै शोक व्यक्त गरेका छन् ।
उनले भारतको प्रतिष्ठित भारत रत्न, दादा साहेब फाल्के लगायतका सम्मान तथा अवार्ड प्राप्त गरेकी छन् ।
मुल तस्बिरमा चलचित्र माइतीघरको गीत रेकर्डिङका क्रममा संगीतकार जयदेव बर्मनका साथ भोलाजी, निर्माण नियन्त्रक नन्दकिशोर तिमिल्सेना, गीतकार प्रदीप रिमाल, चलचित्रका नायक चिदम्बरप्रसाद लोहनी, गायिका लता मंगेशकर, गायिका अरुणा लामा, गायक प्रेमध्वज प्रधान र संगीतकार शरण प्रधान । तस्बिर श्रोतः प्रकाश सायमी