गुरु नानक जयन्तीका अवसरमा पशुपतिस्थित राजराजेश्वरी निर्मल अखडामा ‘गुरु ग्रन्थ साहिब’ पाठ गराउनाका साथै साधुसन्तलाई भण्डारा गराइने स्वामी गोकुलानन्दले जानकारी दिनुभयो । यसैगरी पशुपतिकै भष्मेश्वर, ज्ञानेश्वर र थापाथलीमा रहेको गुरु नानक मठमा पनि विविध कार्यक्रम आयोजना गरी नानक जन्मजयन्ती मनाइने जनाइएको छ ।

यस वर्ष पनि कोरोना महामारीको जोखिम कायमै रहेका कारण भौतिक दूरी कायम गर्दै स्वास्थ्य सुरक्षाका विधि अपनाएर नानक जयन्ती मनाइने जनाइएको छ ।

यस दिन पवित्रस्थल गुरुद्वारामा विशेष पूजाअर्चना गर्दै विभिन्न धार्मिक एवं सामाजिक कार्यक्रम गरी गुरुनानकको जन्मजयन्ती मनाउने गरिन्छ । शिखहरूको पवित्र धार्मिक ग्रन्थ ‘गुरु ग्रन्थ साहिब’ को रचना गर्ने गुरुनानकले समाजमा व्याप्त अन्धविश्वास, घृणा र भेदभावको अन्त्य गरी आपसी प्रेम तथा भ्रातृत्वको भावनालाई अभिवृद्धि गर्ने उद्देश्यले बिनाभेदभाव निःशुल्क सामुदायिक भोजन गर्ने ‘लङ्गर परम्परा’को थालनी गर्नुभएको थियो ।

निर्गुण उपासनाका पक्षपाती गुरुनानक ‘ईश्वर एक छन्, उनी सर्वशक्तिमान छन्, यही नै सत्य हो’ भन्नेमा उहाँ विश्वास गर्नुहुन्थ्यो ।

गुरु नाककको सम्मानमा सिक्का

नेपाल राष्ट्र बैङ्कले सिख धर्मका संस्थापक गुरु नानकको ५५० औं जन्म जयन्तीका अवसरमा वि.संं २०७६ सालमा तीन स्मारक सिक्काहरू जारी गरेको छ। नेपाली रुपैयाँ १००, १,००० र २,५०० दरका प्रतिकात्मक सिक्काहरू नेपाल राष्ट्र बैङ्कले २७ सेप्टेम्बर २०१९ का दिन एक समारोहका बिच काठमान्डुमा जारी गरेको थियो। नेपाल राष्ट्र बैङ्कका गभर्नर डा चिरञ्जीवी नेपाल र नेपालका लागि भारतका राजदूत मंजिभ सिंह पुरीले संयुक्त रूपमा ती सिक्काहरू लोकार्पण गरेका थिए ।

ती सबै सिक्काहरूको एक तर्फ “एक ओमकार” भनिने सिख धर्म सम्बन्धी चिन्हका साथ “गुरु नानक देवको ५५० जन्म जयन्ती” छापिएको छ।