अन्तरिक्ष यान चन्द्रमामा अवतरण गरेको ६ घण्टा ३९ मिनेटपछि निलले चन्द्रमामा पाइला टेकेका थिए । निल आर्मस्ट्रंग चन्द्रमामा पाइला टेक्ने पहिलो मानव हुन् ।

उनले चन्द्रमामा पाइला टेकेको १९ मिनेटपछि एल्ड्रिनले चन्द्रमामा पाइला टेकेका थिए । उनीहरुले सवा दुई घण्टा अन्तरिक्षयान बाहिर चन्द्रमामा बिताएका थिए । उनीहरुले साढे २१ किलो चन्द्रमाको माटो तथा ढुंगासहितका सामग्री पृथ्वीमा ल्याएका थिए ।

मानवले चन्द्रमामा पाइला टेक्दा जुलाई २१ भएको थियो, तर एपोलो ११ जुलाई २० मै चन्द्रमाको सतहमा अवतरण भएको थियो । नेपाली समय अनुसार सन् १९६९ को जुलाई २१ को बिहान ९ बजेर २१ मिनेट जाँदा नील एपोलोबाट बाहिर निस्केर चन्द्रमाको सतहमा आफ्नो पाइला राखी इतिहास बनाएका थिए । तत्कालीन सोभियत युनियनसँगको अमेरिकाको शितयुद्धका कारण सुरु भएको चन्द्र यात्राले अन्ततः विश्व इतिहास बनेर कायम रहन सफल भयो ।

एपोलो-११ मिसन तथा एपोलो-१७ मिसनमार्फत नेपालको झण्डा पनि चन्द्रमाको सतहमा पुर्याइएको थियो । जुन राजा महेन्द्र तथा वीरेन्द्रको जुनाफमा तत्कालीन अमेरिकी प्रतिनिधिले चन्द्रमाको चट्टान सहित उपहार चढाएका थिए । चन्द्रमाको सतहको चट्टान तथा चन्द्रमामा पुर्याएर फर्काइएको नेपालको झण्डा हाल राष्ट्रिय संग्राहलयमा प्रदर्शनीमा राखिएको छ ।  

सन्दर्भ सामाग्री

विभिन्न अनलाइनहरू
नेपाली फ्ल्याग फेसबुक पेज