प्रेरणादायी यथार्थ, २०२० सालमा आरनमा फलाम पिट्ने दलवीर सिंहले भेरी नदीमाथि ४३५ फुटको पुल बनाए

पढ्न लाग्ने समय : 4 मिनेट

दैलेख जिल्लाका दलवीर सिंह जन्मले कामी थिए । अक्षर केही चिन्न सक्ने तर आफ्नो मेहनतमा बाँचेका । बाजे बराजुका पालदेखी सञ्चालनमा रहेको उनको आफ्नो आरन थियो । जहाँ दलवीर फलामका कामहरु गर्दथे । उनको कामप्रति लगन र मिहेनत थियो ।


दलवीरको आरन
 

वि.सं २०१९ सालतिर उनलाई भेरी नदीमा झोलुङ्गे पुल बनाउन इच्छा जाग्यो । उनि धनी भएर झोलुङ्गे पुल बनाउन लागेका थिएनन् । वर्षातमा उर्लेर आउने भेरीको भेललाई देखेका थिए । यसैले उनलाई एउटा पुलको आवश्यकता महशुस भयो । उनले आफ्नो सीप र ज्ञानको उपयोग गर्दै आवश्यक सामग्रीहरु आफैँले तयार गर्न थाले । लामो फलामे तार तथा अन्य सामग्रीको सहयोगले पुलको तयारी गर्न थाले । गाउँलेले पुलको खाँबो गाड्न तथा पुलको भार थेग्नको लागी मोटो तारलाई ठूलो खाल्डोमा पर्याप्त ढुङ्गाहरु राखेर बाँध्नमा सहयोग गरे । हिँड्नको लागी काठका साना साना फल्याकहरु लहरै बाँधे । दायाँ बायाँ मानिस पुलबाट नखसुन भनेर त्यहाँ पनि बलियोसँग तारहरु बाँधे ।

यो पनि पढ्नुहोस् सुर्खेतका वैज्ञानिक दलवीर सिंह कामीको कथा


सुर्खेत क्षेत्रमा पुल बनाउँदै  सब-ओभरसियर दलवीर सिंह 

वि.सं. २०२० सालमा सुर्खेत जिल्लाको उत्तरगंगाको भेरी नदीमा करिब ४३५ फुट लामो झोलुङ्गे पुल तयार भयो ।


दलवीरले बनाएको ४३५ फुट लामो पुल । 

पुल तयार भएपछि मानिसहरुलाई धेरै सहजता भयो । सुर्खेत जिल्लाको उत्तरगंगामा भेरी माथि बनाइएको यो पुलको बारेमा राजा महेन्द्रलाई पनि सुनाइएछ । वि.संं २०२१ सालमा राजा महेन्द्रको सुर्खेत भ्रमणका क्रममा राजाले दलवीर सिंहलाई भेटे । राजा महेन्द्रले उनको कामको निकै प्रशंसा गर्दै तत्कालै रु. ४०० बक्सिस दिए, साथमा दलवीर सिंहलाई जागिर दिन आदेश पनि ।

सुर्खेतमा आफ्नै घर अगाडि श्रीमती, काखमा छोरा श्यामलाल, सानो छोरा तिर्थबहादुर, दलवीर तथा अगाडि आफन्त छोराहरु

केबल ३ कक्षासम्म पढेका दलवीरलाई राजाको आदेशपछि उनको काम र सीप अनुसारको काम दैलेख जिल्ला पञ्चायतले सब-ओभरसियरको जागिर दियो । पुल बनाउने राम्रो ज्ञान भएको हुँदा उनको जिम्मामा झोलुङ्गे पुल सम्बन्धी कामको थियो । सबै काममा केबल पढाइले मात्र हुँदैन, अनुभव र ज्ञान पनि हुनुपर्छ जुन दुवै दलवीरको साथ थियो । थिएन त केबल पढाइ थिएन । कनीकुथी अक्षर पढ्न र लेख्न जानेकै थिए । तर इञ्जिनियर पढेकै थिएनन् । तर पनि सब-ओभरसियरको रुपमा जागिर पाए, पाैरख देखाएर ।


खेतीकिसानी गर्दै सब-ओभरसियर दलवीर सिंह

जागिरे भए पछि उनको निरिक्षणमा दैलेख जिल्लाका लोहोरी खोलाको चुप्रा पुल र छमघाट खोलाको झोलुङ्गे पुल बनाइएको थियो । छमघाट खोलाको झोलुङ्गे पुल बनाउने सामग्री खरिदको लागि भने दलवीर कानपुर पनि पुगेका थिए । यहाँ प्रस्तु गरिएका तस्बिरहरूमा दलवीर सिंहले काम गर्दै गरेका क्षणहरूका छन्, सबै तस्बिर अमेरिकी स्वयंसेवी दल पिसकोरका सदस्य एलन फेयरबैंकले कैद गरेका हुन् । 


रावतकोटको छमघाट खोलाको झोलुङ्गे पुल उद्घाटनको सामुहिक तस्बिर, बायाँपट्टी छाता बोकेर पुलसँगै उभिएका दलवीर सिंह ।

प्रस्तुती सुनिल उलक

धेरै पढिएको

  1. सेतो दरबारमा आगलागीः नेपालमा दमकल भित्रियो, अत्तर फुटेर बग्दा वासनाले तीनै सहर मगमगायो
  2. चन्द्रज्योति विद्युत गृह उद्घाटनका अवसरमा श्री ३ चन्द्रशमशेरले दिएको 'स्पीच'
  3. ३ दशकअघि दशरथ रंगशालामा भागदाैडमा परि ९३ जना खेलप्रेमीले ज्यान गुमाए
  4. नेपालको पहिलो सिनेमा घर, 'फस्ट सो' हेर्ने सधैं राजा
  5. यस्तो थियो नेपालले किनेको पहिलो पानी जहाज
  6. स्याल कराउने ताहाचलमा सेतो सोल्टी होटल
  7. नेपालकै पहिलो बिजुली बत्ति बलेको घर
  8. पिचमा घोडा कुदाउँदा चिप्लिएर लड्ला भनि न्यूरोडको सडक आधा ग्राभ्रेल बनाइयो
  9. हिटलरले जुद्धशमशेरलाई दिएको ऐतिहासिक मोटर
  10. जङ्गबहादुर राणाको तलब कति थियो होला ? त्यो बेला एक रुपैँयामा २२ माना मसिनो चामल आउँथ्यो।